Бүгінде әлем ақпаратпен өмір сүреді. Бір ғана жаңалық санаулы секунд ішінде миллиондаған адамға жетеді. Бірақ оның бәрі шындық па? Өкінішке қарай, жоқ. Ақпарат ағыны күшейген сайын жалған мәлімет, арандатушылық және манипуляция да көбейді. Осындай кезеңде кәсіби журналистиканың қоғам алдындағы жауапкершілігі еселене түсті.
Журналистің міндеті – жарыста бірінші болып жаңалық тарату емес, халыққа шынайы әрі тексерілген ақпарат жеткізу. Бір ғана расталмаған ақпарат қоғамда дүрбелең туғызып, адамдардың тағдырына әсер етуі мүмкін. Сондықтан кәсіби журналистика әрбір деректің анықтығына, әрбір сөздің дәлдігіне сүйенеді.
Қазіргі таңда әлеуметтік желіде өзін «сарапшы» немесе «тілші» санайтындар көбейді. Алайда кәсіби журналистика – пікір айту емес, фактіні сөйлету. Бұл – жауапкершілік пен адалдыққа негізделген мамандық. Сенсация қуып, рейтинг жинау үшін жалған ақпарат тарату – журналистиканың қағидаларына қайшы.
Қоғамның мемлекетке, институттарға және бұқаралық ақпарат құралдарына деген сенімі дәл ақпарат арқылы қалыптасады. Егер ақпараттық кеңістікте өтірік үстемдік етсе, сенім әлсірейді, ал сенім жоғалған жерде тұрақтылық та болмайды.
Сондықтан бүгінгі таңда кәсіби журналист – тек ақпарат таратушы емес, қоғамдық сананы қалыптастырушы, шындықты қорғаушы тұлға. Оның басты қаруы – дәлел, басты ұстанымы – әділдік, басты мақсаты – халыққа ақиқатты жеткізу.
Ақпарат дәуірінде ең қымбат құндылық – сенім. Ал сенімнің негізі – кәсіби журналистиканың басты қағидасы: жұртшылыққа анық, дәйекті және тексерілген ақпарат жеткізу.