Жамбыл облысындағы Ұлттық ұланның №5513 әскери бөлімінде қызмет ететін қатардағы Василий Мазур қазақ тілін ана тіліндей еркін меңгеруімен көпшіліктің ықыласына бөленді.
Ұлты белорус болса да, қасиетті Жуалы өңірінде өсіп, қазақ мектебінде білім алған сарбаз қазақтың тілі мен дәстүрін бойына сіңірген. Бүгінде оның отбасы да күнделікті тұрмыста қазақ тілінде сөйлеседі.
Василийдің айтуынша, қазақ тіліне деген сүйіспеншілігі бала кезінен қалыптасқан. Қазіргі таңда ол Тараз қаласында қоғамдық тәртіпті қамтамасыз ету кезінде мемлекеттік тілді еркін қолданып, қызметтік міндетін абыроймен атқарып жүр.
Үлгілі әскери қызметші жыл басында өткен «Мемлекеттік тіл – менің тілім» байқауында жеңімпаз атанып, енді «Оңтүстік» өңірлік қолбасшылығы кезеңіне дайындалуда.