ТАЗА ҚАЗАҚСТАН: САРЫАҒАШТА СЕНБІЛІК ЖҰМЫСТАРЫ ЖАЛҒАСУДА
Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» экологиялық бағдарламасы ел аймақтарында қарқын алып келеді. Бұл бастама қоғамның қоршаған ортаға деген жауапкершілігін арттыруға, табиғатты аялау мәдениетін қалыптастыруға және еліміздің әрбір өңірінде санитарлық тазалықты нығайтуға бағытталған. Бүгінде республика бойынша ондаған қала мен аудан тұрғындары сенбіліктерге шығып, өз үлестерін қосып жатыр.
Осы орайда Түркістан облысының Сарыағаш ауданында ауқымды сенбілік шаралары ұйымдастырылды. Акцияға жергілікті әкімдік өкілдері, мемлекеттік қызметкерлер, мектеп пен колледж ұжымдары, еріктілер және тұрғындар атсалысты. Негізгі мақсат – елді мекен аумағындағы экологиялық ахуалды жақсарту, халық арасында тазалық мәдениетін дәріптеу.
Сенбілік барысында республикалық және облыстық маңызы бар автожолдардың бойы, ішкі көшелердегі күл-қоқыстар жиналды. Жол жиегіндегі жабайы шөптер орып, тұрғындарға қауіп төндіруі мүмкін қураған бұталар шығарылды. Сонымен қатар, саябақтар мен демалыс орындарының аумағы тазартылып, арық-атыздар қоқыстан аршылды. Көшелер бойындағы ағаш түптері әктеліп, көрік берді. Бұл жұмыстарға арнайы техникалар мен коммуналдық қызметтердің автокөліктері жұмылдырылып, жиналған тұрмыстық қалдықтар белгіленген қоқыс полигондарына жеткізілді.
Аудандық жастар ұйымдарының мүшелері тұрғындарға үлгі болып, көшелер мен қоғамдық орындарды тазалауда белсенділік танытты. Әсіресе, оқушылар мен студенттердің қатысуы олардың экологиялық санасының артып келе жатқанын аңғартты. Ұйымдастырушылардың айтуынша, мұндай шаралар жас буынды табиғатты қорғауға, қоршаған ортаға ұқыпты қарауға тәрбиелейді.
Сарыағаш тұрғындары сенбілікке белсене шығып, ортақ іске үлес қосты. Қатысушылардың айтуынша, тазалықты сақтау – тек билік пен коммуналдық қызметтің міндеті емес, ол әрбір азаматтың борышы. «Ауламызды, көшемізді таза ұстасақ, балаларымыз да таза, жайлы ортада өседі. Тазалық – денсаулық кепілі» дейді жергілікті тұрғындар.
Облыс әкімдігі тарапынан мұндай шаралар жүйелі түрде жалғасын табатыны хабарланды. Экологиялық мәдениетті көтеру үшін тұрақты түрде түсіндіру жұмыстары жүргізіліп, әлеуметтік желілерде арнайы ақпараттық науқандар жариялануда. Бұл бастама арқылы тұрғындардың табиғатқа деген жауапкершілігі артып, тұрмыстық қалдықтарды бей-берекет тастау фактілері азаяды деп күтілуде.
Қоршаған ортаны қорғау – мемлекет пен қоғамның ортақ міндеті. «Таза Қазақстан» акциясы осы бағыттағы нақты қадамдардың бірі. Сарыағаштағы сенбілік жұмыстары көрсеткендей, егер әрбір азамат өз үлесін қосса, қалалар мен ауылдар әлдеқайда жайлы әрі таза болмақ.