Қай заманды алсақ та, ұлттың рухани қуаты мен бағыт-бағдарын анықтайтын ең басты тетік – идеология болған. Идеология – бұл жай ғана саяси ұран немесе ресми құжаттар жиынтығы емес, ол халықтың дүниетанымын, мақсатын, ұлт ретінде өмір сүру мәнін қалыптастыратын идеялық өзек.
Идеологиясы жоқ ел – өз болашағын басқа күштердің ықпалына тапсырған ел. Мұндай ұлттың санасын сыртқы мәдениеттер, бөгде идеологиялар, мүдделі топтардың ақпараттық ықпалы жаулап алады. Тарихта мұндай мысал аз емес: рухани іргесін ұстай алмаған халықтар біртіндеп өз тілінен, дәстүрінен, мемлекеттілігінен айырылған.
Қазіргі заманда идеологияның орны бұрынғыдан да өзекті. Ақпарат тасқыны шексіз, жалған құндылықтар жылдам тарайды. Осындай кезеңде ұлттық идея мен бағыт болмаса, қоғам бейберекет, мақсатсыз, тұтастығын жоғалтқан күйге түседі.
Бізге ұлттық идеология керек, бірақ ол қағаздағы декларация емес, іс жүзіндегі бағдар болуы тиіс. Оның өзегі – тіл, діл, әділдік және елге адал еңбек ету. Ұлт идеологиясы әр қазақтың бойына «Мен кіммін?» деген сұраққа нақты жауап беретін рухани иммунитет сіңіруі тиіс.
Қазақ қоғамының бүгінгі ахуалы – идеологиялық вакуумның салдары. Бірі Батысқа, бірі Шығысқа, бірі байлыққа, бірі даңққа еліктеп, ортақ бағыттан айырылып барамыз. Ұлттық идеология – осы сан тарауға шашыраған энергияны бір арнаға тоғыстыратын күш.
Идеология дегеніміз – ұлттың жүрегі. Ал жүрегі соқпайтын дене қанша тірі көрінсе де, шын мәнінде өлі. Ендеше, қазақ идеологиясын жаңғырту – мемлекетті сақтау, болашақты қорғау, ұлттың рухын қайта тірілту ісі.
Бердалы ОРАЗ