Қазақстандық жас балуан әлемдік додада топ жарып, ел мерейін үстем етті.
19 жастағы қазақ баласы Қазыбек Қалмағамбетов грек-рим күресінен әлем чемпионатында алтын медаль иеленді. Жас спортшы Братиславада өткен U20 әлем чемпионатында 67 келіге дейінгі салмақта бақ сынап, қарсыластарының барлығынан басым түсті.
Шешуші белдесуде Қазыбек Беларусь елінің өкілі Михаил Марковскиймен кездесіп, 13:7 есебімен жеңіске жетті. Осылайша ол өз салмағында әлемнің үздігі атанып, Қазақстан қоржынына алтын жүлде салды.
Жас балуанның бұл жетістігі – отандық күрес мектебінің әлеуетін тағы бір мәрте дәлелдеген нәтиже. 19 жасында әлемдік аренада чемпион атану Қазыбектің спорттағы болашағы зор екенін көрсетеді.
Жеңіс – тынымсыз дайындық пен табанды еңбектің жемісі. Қазыбектің әлем чемпионатындағы жеңісі жас спортшыларға үлкен мотивация беріп, қазақ күресі мен грек-рим күресіне деген қызығушылықты арттыра түсері сөзсіз.
Жас чемпионның жеңісі – ел спортының жарқын болашағына жасалған нық қадам. Қазақстанның көк туын әлемдік аренада желбіреткен Қазыбекке алдағы жарыстарда да толағай табыс тілейміз!