Алматы облысында жұмыс бар, бірақ маман жетіспейді. Кейбір кәсіпорындар білікті кадр тарту үшін 1,25 млн теңгеге дейін жалақы ұсынуға мәжбүр. Соған қарамастан өңір алдағы жылдары 21 мыңнан астам маманға мұқтаж болады.
Еңбек нарығындағы ең қызық көрсеткіштің бірі – облыстағы орташа айлық пен жоғары жалақы ұсыныстарының арасындағы алшақтық. 2026 жылдың бірінші тоқсанында Алматы облысындағы орташа айлық 376 012 теңге болған. Ал кейбір бос жұмыс орындарында ұсынылатын жалақы бұл сомадан бірнеше есе жоғары.
Мәселен, заң бөлімінің басшысына 1,25 млн теңгеге дейін жалақы ұсынылып отыр. Бас бухгалтер, бөлім басшысы, бас механик және жоба бойынша бас технолог сияқты жоғары білікті мамандарға 1 млн теңгеге дейін төленуі мүмкін.
Яғни еңбек нарығында парадокс қалыптасқан: жұмыс берушіге адам керек, ал қажетті білімі мен тәжірибесі бар маманның бағасы өсіп барады.
Миллион теңгелік жалақы тек басшыларға емес
Жоғары жалақы негізінен басқарушы қызметтермен шектелмейді.
Медицина саласында жалпы хирургке 950 мың теңгеге дейін, ал бас дәрігер немесе мекеме басшысына 877 мың теңгеге дейін жалақы ұсынылған.
Техникалық мамандықтардың да құны артып келеді. Бас инженер, геодезист, тиегіш машиналардың машинисі, жинақтаушы және қойма меңгерушісі секілді мамандарға 600–700 мың теңге көлемінде табыс ұсынылады.
Бұл – жұмысшы және техникалық мамандықтарға деген сұраныстың бұрынғыдан да күшейгенін көрсетеді.
21 мың маман қайдан келеді?
Мәселе бір-екі бос жұмыс орнымен шектелмейді.
Алдағы жылдары Алматы облысына 21 мыңнан астам маман қажет болады. 2026 жылы еңбек нарығына 4 792 маман керек болса, 2027 жылы – 4 723, 2028 жылы – 4 793 маман қажет деп болжанған. 2029 жылы бұл көрсеткіш 4 245, 2030 жылы 3 790, 2031 жылы 3 856 маманды құрайды.
2026 жылы ең үлкен сұраныс құрылыс саласында қалыптасып отыр. Бұл бағытта 661 маман қажет. Одан кейін ауыл шаруашылығы – 557, өнеркәсіп пен өндіріс – 333, көлік және логистика – 246 маман.
Демек өңірдің экономикасы өсіп жатқанымен, сол өсімді қамтамасыз ететін кадр мәселесі өткір күйінде қалып отыр.
4 717 бос орын бар
Электрондық еңбек биржасындағы мәлімет те жағдайдың ауқымын көрсетеді. Enbek.kz платформасында Алматы облысы бойынша 2 432 хабарландыру және 4 717 бос жұмыс орны