Арыс қаласында биыл инфрақұрылымды дамыту мен тұрғындардың өмір сапасын жақсартуға бағытталған ауқымды жобалар жүзеге асады. Бұл туралы қала әкімі Қайсар Маңқараевтың халықпен есептік кездесуінде мәлім болды.
Әкімнің айтуынша, тұрғындармен өткен кездесулер мен жеке қабылдауларда көтерілген ұсыныстар қаланың даму жоспарына енгізіліп, нақты жобалар бойынша жұмыстар басталады.
Негізгі жобалар:
- Ауызсу жүйесі жөнделетін елді мекендер: Қаражантақ, Бақырша, Дермене, Теміржолшы, Байтоғай, Қожатоғай, Атамекен, Шөгірлі.
- Қоғамдық көлік инфрақұрылымы: 10 жаңа аялдама орнатылады, 3 бағдаршам іске қосылады.
- Жол жөндеу жұмыстары: Қаладағы 7 көше мен Тараз ауданында жаңа жол, Асылбеков көшесіндегі көпқабатты үйлердің аулалары жөнделеді.
- Аяқ жолдар: Теміржол көпірінен Мұстафин көшесіне дейін, сондай-ақ Ақдала ауылындағы М.Мақатаев көшесіне аяқ жол төселеді.
- Ауылдық жолдар: П.Арапов пен Байтоғай елді мекендерінде жаңа жолдар салынады, 11 елді мекеннің көшелеріне тас төселеді.
- Жылу жүйесі: Көктем ауданы мен Әйтеке би көшесіндегі үйлердің жылу желілері жаңартылып, қысқы маусымға дайындық жүргізіледі.
- Балалар ойын алаңшалары: 12 жаңа алаңша орнатылады (5-еуі қалада, 7-еуі елді мекендерде).
- Спорт нысандары: Жиделі, Монтайтас, ШПЗ ауданындағы футбол алаңдары жөнделіп, Саяжай ауданында жаңа алаң салынады.
Бұл бастамалар қаланың инфрақұрылымын жақсартып, тұрғындардың күнделікті өмірін жеңілдетуге бағытталған.