Шымкент әкімінің орынбасары Руслан Берденовке қарсы жасалған қастандықтың себептері туралы жаңа мәліметтер жарияланды. Болжам бойынша, бұл оқиға «Тұрғын үй Шымкент» ЖШС-не бөлінген 3,4 миллиард теңгемен байланысты болуы ықтимал. Компания директоры, қазір күдікті ретінде қамауға алынған Ернар Жиенбай, осы қаражатты мақсатсыз пайдаланған деген күдік бар.
Берденовке шабуылдан он күн бұрын әкімдікте өткен жиында Ернар Жиенбай агрессивті мінез көрсеткені үшін залдан шығарылған. Осы оқиғадан соң оны қызметінен босату мәселесі қозғалған. Дереккөздердің мәліметінше, көпқабатты үйлерді жөндеуге арналған 3,4 миллиард теңге ешқандай конкурс өткізбестен, тікелей «Тұрғын үй Шымкент» ЖШС-не тапсырылған. Мемлекеттік сатып алу сайтында бұл қаржы бөлінісі бойынша ашық дерек жоқ.
Компанияның ресми парақшасындағы ақпаратқа сәйкес, 2024 жылы 15 үйде жөндеу жұмыстары аяқталған, ал 2025 жылы тағы 10 үйде жұмыс басталған. Алайда тергеу материалдары Ернар Жиенбай қаржыны мақсатсыз жұмсады немесе иемденді деген күдік туғызды. Қазір бұл факті бойынша қызметтік тексеріс жүргізілуде.
21 сәуір күні кешке, Шымкент қаласы әкімдігінің маңында Руслан Берденовке оқ атылған. Шенеунік ауыр жараланып, ауруханаға жеткізілді. Дәрігерлердің айтуынша, оның өміріне қазір қауіп төніп тұрған жоқ. Қылмыстық іс қозғалып, күдікті уақытша ұстау изоляторына қамалды.