Мемлекет басшысы болашақта Конституцияға кез келген, тіпті шағын өзгерістер енгізу қажет болған жағдайда, ондай шешім тек референдум арқылы қабылдануы тиіс деген ұстанымын білдірді.
Президенттің айтуынша, бұл қадам азаматтардың саяси-құқықтық рөлін күшейтудің маңызды тетігі болмақ.
– Конституция – елдің ең басты бағыт-бағдарын айқындайтын темірқазық құжат. Оны әр азамат білуі әрі қадірлеуі қажет. Сондықтан оған қатысты кез келген түзету халықтың тікелей қатысуымен жүзеге асуы тиіс, – деді Президент.
Сондай-ақ Мемлекет басшысы арнайы комиссия Конституцияға қатысты барлық ұсыныстарды жан-жақты саралағанын атап өтті. Нәтижесінде әзірленген түзетулер Ата заңның барлық негізгі бөлімдері мен баптарын, оның ішінде преамбуласын да толық қамтитын болады.