Сайрам ауданындағы құрылыс, сәулет және қала құрылысы бөлімі мамандары «Қазақстан Республикасындағы сәулет, қала құрылысы және құрылыс қызметі туралы» 2001 жылғы №242 Заңының 26-бабына сәйкес бірнеше нысанда зерделеу жұмыстарын жүзеге асырды.
Тексеру барысында заң талаптарының бұзылуы анықталып, материалдар Түркістан облысы бойынша бақылау басқармасына жолданды. Басқарма 8 нысан бойынша тексеріс тағайындап, меншік иелеріне Әкімшілік құқық бұзушылық туралы Кодекстің 316-бабы (жобалық құжаттаманы бұзу), 321-бабы (құрылыс саласындағы өз бетінше әрекет ету) және 463-бабы (рұқсатсыз қызмет) бойынша әкімшілік шаралар қолданды.
Нәтижесінде меншік иелеріне айыппұл салынғанымен қатар заңбұзушылықтарды жоюға міндеттелді. Бұл іс-шаралар құрылыс саласындағы заңдылық пен тәртіпті сақтау мақсатында ұйымдастырылды.
Аудандық құрылыс бөлімі бақылау және алдын алу жұмыстарын жүйелі түрде жалғастыра отырып, тұрғындардың қауіпсіздігі мен аймақтың тұрақты дамуына жағдай жасауды көздейді.