Түркістан облысының Түлкібас ауданында ауыл шаруашылығы саласы жаңа серпін алуда. Мұнда «Дар Арганик» шаруа қожалығы шетелден әкелінген асыл тұқымды сиырларды бағып, сүт өндірісін кең көлемде жолға қойған.
Аталған қожалық Финляндиядан арнайы жеткізілген «Айршери» тұқымды ірі қара малын баптап отыр. Әрқайсысын шамамен 3500 еуроға сатып алынған 91 бас сиыр бүгінде тәулігіне орта есеппен 2,5 тонна сапалы сүт береді. Оның майлылығы 4 пайыздан жоғары, сондықтан өнімге сұраныс та зор. Сүт негізінен жергілікті «Майлыкент сүт» зауытына және Сайрам ауданындағы қайта өңдеу кәсіпорындарына өткізіледі.
Мамандардың айтуынша, бұл тұқымның ерекшелігі – өнімділігінің жоғарылығы. Бір сиырдан күніне 25–33 литр аралығында сүт саууға болады. Барлық процесс заманауи технологиялар арқылы автоматтандырылған, ал бұл өнімнің сапасын сақтауға және еңбекті жеңілдетуге мүмкіндік береді.
Жақында аудан әкімі Асқар Естібаев аталған шаруашылыққа арнайы барып, өндірістің барысымен танысты. Кәсіпкер әкімге алдағы жоспарлары туралы айтып, мал басын көбейту үшін мемлекет тарапынан жеңілдетілген несиеге қолдау көрсетуді сұрады. Өз кезегінде аудан басшысы бұл бастамаға қолдау көрсетілетінін жеткізіп, жауапты мамандарға нақты тапсырмалар берді.
Шаруа қожалығының иесі жақын уақыт ішінде сиыр санын 391 басқа жеткізуді көздеп отыр. Егер мемлекеттік көмек болса, бірнеше жылдың ішінде мал басын 1500-ге дейін арттыруды жоспарлауда. Бұл аймақ үшін аса маңызды бастама, өйткені сүт өндірісі ауыл халқының тұрмысын көтеріп қана қоймай, жаңа жұмыс орындарының ашылуына да жол ашады.
Бүгінде нысанда 20 адам тұрақты жұмыспен қамтылған. Сонымен бірге, шаруашылықта 82 бұзау өсірілуде. Айта кетерлігі, «Дар Арганик» қожалығы елімізде дәл осы асыл тұқымды ірі қараның ресми патент иегері саналады. Бұл олардың отандық нарықтағы артықшылығын арттыра түседі.
Жалпы Түлкібас ауданында мал шаруашылығымен айналысатын 193 қожалық бар, оның ішінде тек бесеуі ғана сүт өндірісіне маманданған. Солардың ішінде «Дар Арганиктің» үлесі ерекше, себебі ол ауданның ғана емес, облыстың да сүт нарығына айтарлықтай ықпал етіп отыр.
Мамандардың пікірінше, егер шаруашылық алдағы жылдары жоспарлағандай мал басын көбейтіп, өндіріс көлемін арттырса, Түркістан облысы ішкі нарықты сапалы сүтпен қамтамасыз етіп қана қоймай, көрші өңірлерге де экспорт көлемін ұлғайта алады. Бұл – ауыл экономикасын нығайтып, өңір халқының әл-ауқатын жақсартуға бағытталған маңызды қадам.
Түлкібастық шаруаның үлгісі – ауылдағы еңбек пен жаңа технологияны ұштастырған табысты жобаның жарқын мысалы.