Қазақстан Республикасының Білім министрлігінің «Өрлеу» Ұлттық біліктілікті арттыру орталығы мұғалімдердің психикалық денсаулығын нығайту және кәсіби дамуын қолдау мақсатында жаңа жобаны іске қосты. Жобаның аясында психолог кабинеттері алғаш рет Түркістан және Ақтөбе облыстарындағы филиалдарда жұмыс істей бастады.
Пилоттық жоба мұғалімдердің кәсіби күйзелісін болдырмауға, психологиялық әл-ауқатын сақтауға және стрессті тиімді басқаруға бағытталған. Кабинеттерде кәсіби психологтар жеке және топтық консультациялар, релаксация мен арт-терапия сабақтарын жүргізеді, сондай-ақ психологиялық диагностика мен тренингтер өткізеді.
Қызметтер «Өрлеу» орталығында біліктілігін арттыру курстарынан өтетін педагогтарға қолжетімді. Жұмыс барысында этикалық нормалар, еріктілік және құпиялық қағидалары қатаң сақталады. Болашақта мұндай психологиялық қолдау кабинеттерін еліміздің басқа аймақтарында да ашу жоспарланып отыр, бұл мұғалімдердің менталдық саулығын жүйелі түрде қамтамасыз етуге бағытталған маңызды қадам болып саналады.