Түркістан облысында Мемлекет басшысы Қасым-Жомарт Тоқаевтың Қазақстан халқына арнаған Жолдауында айтылған тапсырмаларды орындау бағытында жүйелі жұмыстар атқарылып келеді. Әсіресе әлеуметтік қолдау мен денсаулық сақтау салаларын дамытуға басымдық берілуде. Бұл туралы облыс әкімінің орынбасары Бейсен Тәжібаев өңірлік коммуникациялар қызметінде өткен брифингте мәлімдеді.
МӘМС жүйесін жетілдіру
Аймақ халқының 83 пайызы міндетті әлеуметтік медициналық сақтандыру жүйесімен қамтылған. Ал 351 мыңнан астам тұрғын, яғни 17 пайызы сақтандырудан тыс қалған. Олардың ішінде 85 мыңнан астамы – жұмыссыз және әлеуметтік осал топқа жататын азаматтар. Бұл санаттағы тұрғындарды МӘМС-пен қамту үшін жергілікті бюджеттен қаражат бөлініп, кезең-кезеңімен қамту шаралары жүргізіліп жатыр.
Медицина мамандарының тапшылығы
Облыста 24 мыңнан астам медицина қызметкері бар. Дегенмен, қазіргі таңда өңірде 253 бейінді дәрігер жетіспейді. Бұл мәселені шешу үшін 2023 жылдан бастап жыл сайын резидентурада оқуға жергілікті бюджет есебінен гранттар бөлінуде. Қазіргі таңда 176 жас маман Астана, Алматы, Қарағанды және Түркістан қалаларындағы медициналық жоғары оқу орындарында білім алып жатыр. 2024 жылы тағы 75 грант бөлініп, түгел игерілді.
Жас мамандарды ынталандыру
Ауылдық жерге барған дәрігерлерге қолдау көрсету мақсатында көтерме жәрдемақы қарастырылған. Жас мамандарға 1–1,5 млн теңге көлемінде қаржылай көмек төленеді. Сонымен қатар аса тапшы мамандықтар бойынша жұмысқа орналасқандарға 100 айлық есептік көрсеткіш мөлшерінде біржолғы төлем беріледі.
Жаңа медициналық нысандар құрылысы
Президент тапсырмаларын орындау аясында өңірде бірқатар ірі жобалар қолға алынған. Сарыағаш қаласында 300 орындық көпбейінді аурухана салынады. Ордабасы ауданында 200 орындық перинаталдық орталықтың құрылысы жоспарланған. Абу-Даби қорының қаржыландыруымен (19 млн АҚШ доллары) Түркістан қаласында жаңа перзентхана бой көтеруде. Сондай-ақ сенімгерлік басқару тетігі аясында Сауран ауданында 500 адамға қызмет көрсететін емхана салынбақ.
Әлеуметтік қолдау – басты басымдық
Аймақта әлеуметтік әл-ауқатты арттыру, медициналық қызметтердің қолжетімділігі мен сапасын көтеру мақсатында кешенді шаралар жүзеге асуда. Бейсен Тәжібаевтың айтуынша, Түркістан облысы әкімдігі Мемлекет басшысының тапсырмаларын орындауды басты басымдық санап, нақты нәтижелерге қол жеткізуге ұмтылуда.
Түркістан өңірінде қолға алынған ауқымды жобалар халықтың әлеуметтік жағдайын жақсартып, медициналық қызмет сапасын арттыруға бағытталған. Президент Жолдауында айқындалған міндеттердің өңірлік деңгейде орындалуы – тұрғындардың әл-ауқатына тікелей оң әсер етпек.