Түркістан қаласында биылғы құрылыс маусымы ерекше белсенді өтіп жатыр. Инфрақұрылымдық жобалар жүйелі түрде жүзеге асуда: жаңа көшелер салынып, ескі жолдар жөндеуден өтуде, сонымен қатар коммуналдық жүйелерді тарту жұмыстары жалғасуда. Қаланың келбетін айтарлықтай өзгертетін бұл бастамалар тұрғындардың тұрмыс сапасын арттыруға бағытталған.
Жоспарға сәйкес, 2025 жылы қаладағы 159 көшеге жөндеу жұмыстары жүргізілуі тиіс. Бүгінде соның 79 көшесінде құрылыс толық аяқталып, пайдалануға берілген. Бұл көрсеткіш қаладағы жол инфрақұрылымын кезең-кезеңімен жақсартуға бағытталған нақты қадамдардың нәтижесі екенін айғақтайды.
Түркістан облысының әкімі Нұралхан Көшеров қаладағы бірқатар учаскелерді аралап, жүргізіліп жатқан жұмыстардың сапасымен танысты. Әкімнің назарында әсіресе Отырар мөлтек ауданындағы жолдар болды. Ол орташа жөндеу жұмыстарының барысын өз көзімен көріп, мердігер мекемелердің жұмысын бағалады.
Бұдан бөлек, аймақ басшысы Ойсыл қара және Шаян көшелерімен жаяу жүріп өтіп, жол төсемінің сапасын тексерді. Осы сапар барысында ол жергілікті тұрғындармен әңгімелесіп, олардың ой-пікірлерін тыңдады. Халық жол құрылысының қарқынына оң баға беріп, кейбір мәселелер бойынша ұсыныстарын жеткізді.
Әкім мердігер компания өкілдеріне нақты тапсырмалар беріп, басты назар сапаға аударылатынын айтты.
📌 «Ең маңыздысы – жолдардың сапасы. Қала тұрғындары үшін қауіпсіздік пен жайлылық бірінші орында тұруы тиіс. Сондықтан әрбір нысан уақтылы әрі сапалы атқарылуы қажет», – деді Нұралхан Көшеров.
Бүгінде Түркістан қаласы аймақтың әлеуметтік-экономикалық орталығы ретінде қарқынды дамып келеді. Инфрақұрылымның жаңаруы тек қала тұрғындарына ғана емес, тарихи шаһарға ағылатын туристер үшін де қолайлы жағдай жасайды. Сапалы жолдар, заманауи инженерлік желілер мен абаттандырылған көшелер – облыс орталығының жаңа келбетін айқындайтын басты факторлар.
Мамандардың пікірінше, жоспарланған жұмыстар толық орындалған жағдайда, Түркістан қаласының көлік инфрақұрылымы алдағы бірнеше жылға жеткілікті деңгейде жаңарып, аймақтың даму қарқынын күшейтеді. Бұл өз кезегінде қала экономикасына серпін беріп, тұрғындардың өмір сүру сапасына тікелей әсер етеді.
Аймақ басшылығының айтуынша, алдағы уақытта да бұл бағыттағы жұмыстар жалғасын табады. Жол құрылысы мен инфрақұрылымдық жобаларды жүйелі түрде жүргізу – облыс әкімдігінің негізгі басымдықтарының бірі болып қала бермек.