«Қазақмыс» компаниясы өндірістік апат салдарынан қаза болған кеншілердің отбасыларына материалдық көмек көрсететінін мәлімдеді.Бұл туралы Arysinfo.kz тілшісі хабарлайды.
Компания мәліметінше, марқұм болған жұмыскерлердің отбасыларына олардың орташа жылдық жалақысының 10 еселенген мөлшері төленеді. Сонымен қатар, жерлеу рәсімдерін ұйымдастыру үшін 2 миллион теңгеден астам қаржы қарастырылған.
Ұлытау облысының әкімдігі де зардап шеккен отбасыларға жан-жақты қолдау көрсететінін хабарлады. Жергілікті билік психологиялық және әлеуметтік көмек ұйымдастырып, марқұмдардың жақындарына қажетті моральдық қолдау көрсетуді жоспарлап отыр.
Бұл жағдай тағы да өндірістік қауіпсіздік мәселесінің өзекті екенін көрсетті. Кен орындарында жұмыс істейтін жұмысшылардың қауіпсіздігін қамтамасыз ету, алдын алу шараларын күшейту – қайғылы оқиғалардың қайталанбауы үшін маңызды қадам.
Қазір тиісті органдар апаттың себептерін анықтау үшін тергеу жұмыстарын жүргізуде. Құзырлы мекемелер өндірістегі қауіпсіздік талаптарының сақталуын жан-жақты зерттеп, тиісті шешімдер қабылдайды деп күтілуде.
Қаза тапқан кеншілердің жақындарына редакция атынан қайғырып көңіл айтамыз.