Арыста тазалық пен абаттандыру жұмыстары биыл да қарқынды жалғасып жатыр. «Таза Қазақстан» акциясы аясында қала көшелері, аулалар, саябақтар мен өзен жағалаулары ретке келтіріліп, аумақтар қоқыстан тазартылуда. Жалпықалалық сенбіліктерге мемлекеттік мекемелермен қатар кәсіпорындар, білім беру ұйымдары және тұрғындар белсенді қатысып келеді.
Қала аумағын көркейтуге ерекше көңіл бөлініп, көгалдандыру жұмыстары да жүргізілуде. Көшелер мен қоғамдық орындарға гүлдер отырғызылып, абаттандырылған аумақтардың көлемі артып келеді. Мұндай жұмыстар Арыстың ажарын ашып, тұрғындарға жайлы орта қалыптастыруға мүмкіндік беруде.
Тазалықты сақтауда қала тұрғындарының үлесі де зор. Көптеген тұрғындар өз аулаларын ретке келтіріп, көшелер мен қоғамдық орындарды тазалауға өз еркімен атсалысуда. Бұл Арыста қоршаған ортаға деген жауапкершіліктің қалыптасып келе жатқанын көрсетеді.
Бүгінде тазалық Арыс тұрғындары үшін бір күндік сенбілік емес, ортақ мәдениетке айналып келеді. Таза көшелер, абаттанған аулалар мен көгалдандырылған қоғамдық орындар қаланың көркін арттырып, Арыстың жылдан-жылға жаңарып келе жатқанын аңғартады.