Түркістан қаласындағы «Фараб» кітапханасында «Үш ақын. Үш әлем. Қасиетті қалам» атты атаумен Абай Қалшабектің «Жүрек ішіндегі өмір», Әлімжан Әлішердің «Лаура қосылған Латте», Бауыржан Ерманның «Галактикадағы Ғұмыр» атты кітаптарының тұсаукесері өтті.
Кітаптың тұсауын «Ерен еңбегі үшін» төсбелгісінің иегері, журналист, сазгер, профессор Бекжігіт Кенжебекұлы, Түркістан қалалық маслихатының төрағасы Ғаппар Амантайұлы, ақын, облыстық мәдениет басқармасының бөлім меңгерушісі Мұқағали Кенжетайұлы және «Фараб» кітапханасының директоры Жанат Сәдібекқызы кесіп, көрерменге таныстырды.
Кеш қонақтары Қазақстан Республикасының журналистер одағы, Түркі әлемі жазушылар одағы, Дүние таланттары одағының мүшесі Өтебаева Несіпкүл Мейманханқызы және журналист, Қазақстанның құрметті азаматы Роза Нарымбетова құттықтау сөз алып, ақындардың шығармашылығына шабыт тіледі.
Ақын, журналист, Қазақстан жазушылар одағының Түркістан облысындағы өкілі Айдар Сейдазымның модераторлығымен өткен кеште Түркістан қалалық балалар мен жасөспірімдер орталығының көркем сөз үйірмесінің оқушылары ақындардың өлеңдерін оқыды. Жиналған көпшілік ақындарға қызықтырған сұрақтарын қойып, тұшымды жауап алды.
