Польша премьер министрі Дональд Туск Украинаға саяси,қаржылық және әскери көмек көрсетіп,Еуропаның шығыс қақпасын нығайтатынын мәлімдеді,деп хабарлайды Arysinfo.kz.
Польша премьер-министрі Дональд Туск Еуропа елдерінің Украинаға қолдауды арттыруға, трансатлантикалық әріптестікті күшейтуге және Еуропаның шығыс қақпасын нығайтуға бір ауыздан келісім бергенін мәлімдеді. Оның айтуынша, бұл қадам Еуропаның қауіпсіздігін қамтамасыз етудегі маңызды кезеңдердің бірі болмақ.
Ресей мен Украина арасындағы қақтығыс басталғаннан бері Еуропа елдері Киевке саяси, қаржылық және әскери көмек көрсетіп келеді. Алайда, соңғы айларда қолдау деңгейі туралы түрлі пікірлер туындап, кейбір елдерде соғысқа байланысты шаршау байқалды. Тусктың «Еуропа оянды» деген сөзі Еуропалық Одақтың (ЕО) бұл мәселеде ортақ шешімге келгенін және Украинаға көмекті күшейтуге дайын екенін көрсетеді.
Польша премьері Еуропаның АҚШ және НАТО-мен байланысын нығайту қажеттігін ерекше атап өтті. Бұл Ресейден төнетін қауіп-қатерге қарсы тұруда шешуші рөл атқарады. Трансатлантикалық әріптестіктің күшеюі қорғаныс саласындағы ынтымақтастықты тереңдетіп, НАТО-ның Шығыс Еуропадағы рөлін арттырады.
Тусктың «Еуропаның шығыс қақпасын күшейту» туралы мәлімдемесі Польша, Балтық елдері және басқа да шығыс шеткі аймақтардағы қорғанысты нығайтуға бағытталған. Бұл елдер Ресейдің ықтимал агрессиясына қарсы негізгі тосқауыл болмақ.