Арыс қаласында жер қойнауын заңсыз пайдалануға тосқауыл қойылуда,-деп хабарлайды Arysinfo.kz тілшісі.
Түркістан облысында жер қойнауын заңсыз пайдалануға қарсы қатаң шаралар қолға алынды. Бұл бағыттағы жұмыстар аясында жауапты органдардан құрылған арнайы топ Арыс қаласы аумағында рейд жүргізді.
Тексеру барысында Арыс-Шардара тас жолында белгіленген нормадан артық жүк тиеген ауыр көліктер анықталды. Құрылыс материалдарын тасымалдау кезінде жүк салмағын шамадан тыс арттырған жүргізушілерге әкімшілік хаттамалар толтырылып, айыппұл салынды.
Мамандардың айтуынша, жер қойнауын заңсыз пайдалану экологиялық тепе-теңдікті бұзып, жол инфрақұрылымына да кері әсер етеді. Сондықтан алдағы уақытта құм, қиыршық тас тиеген көліктердің жабынының болуы, артық салмақпен жүк тасымалдаудың алдын алу сынды шаралар қатаң бақылауда болады.
Жер қойнауын заңсыз пайдалану мәселесі тек құқықтық емес, экологиялық және экономикалық маңызға ие. Сол себепті құзырлы органдардың осындай рейдтік шаралары тұрақты түрде жүргізілмек.