Нұрали Әлиев «Транстелеком» АҚ директорлар кеңесінің төрағасы қызметінен кетіп, акционерлер қатарынан шықты. Бұл туралы ол Instagram парақшасында хабарлап, шешімнің компанияны сатуымен байланысты екенін атап өтті.Бұл туралы Arysinfo.kz тілшісі хабарлайды.
«Транстелеком» – Қазақстандағы телекоммуникациялық және IT-қызметтерін ұсынатын ірі байланыс операторларының бірі. Forbes мәліметінше, компанияның 75% акциясы бұған дейін Unit Telecom арқылы Нұрали Әлиев пен Дмитрий Покупателевке тиесілі болған, ал қалған 25% «Қазақстан темір жолы» компаниясының иелігінде еді.
Бастапқыда «Транстелеком» мемлекеттік компания ретінде жұмыс істеген, алайда 2015 жылы жекешелендіріліп, 9 миллиард теңгеге сатылды. Алайда 2022 жылдың сәуірінде Қазақстан Үкіметі жекешелендіру процесінің заңдылығын тексеру мәселесін көтерді, әсіресе мәміле барысында мемлекетке келтірілген ықтимал шығындар назарға алынды.
Әлиевтің компанияны сату туралы шешімі оның болашақ меншік иелеріне байланысты жаңа өзгерістердің орын алуы мүмкін екенін көрсетеді. Қазіргі таңда «Транстелеком» басшылығында қандай өзгерістер болатыны туралы ресми ақпарат жоқ.