Шымкент қаласының «Көктем» базарының кәсіпкерлері үшін қуанышты жаңалық: олар өз қызметтерін жалғастыру үшін жаңа әрі заманауи сауда орталығына көшеді. Жаңа ғимараттың ашылуы кәсіпкерлерге үлкен мүмкіндік ұсынып отыр, өйткені олар 2025 жылдың 1 мамырына дейін жалдау ақысы төлемей жұмыс істей алады. Бұл қадам олардың бизнесін ешқандай кедергісіз жүргізуіне мүмкіндік бермек.Бұл туралы Arysinfo.kz тілшісі хабарлайды.
Жаңа сауда орталығы – үш қабатты заманауи ғимарат, жалпы алаңы 7200 шаршы метрді құрайды. Орталықта кәсіпкерлерге жаңа сауда орындары ұсынылады, олар әр қабатта түрлі тауар түрлерін сатуға арналған. Сауда орталығының әр қабаты арнайы мақсаттарға бөлінген:
1-қабатта – сантехника және құрылыс материалдары,
2-қабатта – күнделікті тұтыну тауарлары, соның ішінде көкөніс, жеміс-жидек және ет өнімдері,
3-қабатта – киім-кешек, ойыншықтар және басқа тауарлар.
Айта кетерлігі, алғашқы 3 ай бойы кәсіпкерлер жалдау ақысын төлемейді. Кейіннен, олардың жаңа сауда орындарында жалдауға кететін шығындары «Көктем» базарында төлеген ақы деңгейінде сақталады. Мысалы, егер кәсіпкер бұрын 2×3 метр өлшеміндегі бутикті жалға алу үшін 25 мың теңге төлеген болса, жаңа сауда орталығында да дәл осы соманы төлейтін болады.
Кәсіпкерлерге түсіндіру жұмыстары жүргізіліп, жаңа сауда орталығына көшу процесі толықтай үйлестірілді. Бұл өзгеріс Шымкенттегі сауда нарығын одан әрі жаңартып, кәсіпкерлердің жұмысын жеңілдетуге бағытталған.