Түркістан өңірінде биылғы жазғы маусымда балалардың демалысын тиімді ұйымдастыру мақсатында ауқымды жұмыстар қолға алынды. Облыс аумағындағы қала сыртында орналасқан 23 жазғы сауықтыру лагерінде 35 мыңнан астам бала тынығып, жазғы демалысын мазмұнды өткізеді деп жоспарланып отыр.
Балалар лагерлері оқушылардың қауіпсіздігін қамтамасыз ете отырып, олардың денсаулығын нығайтуға, шығармашылық қабілеттерін дамытуға және бос уақытын тиімді өткізуіне бағытталған түрлі бағдарламаларды ұсынады. Әр лагерьде спорттық жарыстар, мәдени-танымдық іс-шаралар, үйірмелер мен шеберлік сабақтары ұйымдастырылады.
Сонымен қатар, лагерьлердің материалдық-техникалық базасы жаңартылып, санитарлық талаптарға сай жағдай жасалуда. Балалардың қауіпсіздігі мен денсаулығы басты назарда болып, медициналық қызмет пен тамақтану сапасы қатаң бақылауға алынған.
Жазғы демалыс маусымын жоғары деңгейде өткізу үшін жауапты мекемелер тарапынан дайындық жұмыстары күшейтіліп, ата-аналармен де түсіндіру жұмыстары жүргізілуде. Бұл өз кезегінде жас ұрпақтың сапалы әрі қауіпсіз демалуына мүмкіндік береді.
Айта кетейік, мұндай шаралар балалардың жан-жақты дамуына оң әсер етіп, олардың жаңа ортада достар тауып, пайдалы дағдыларды меңгеруіне жол ашады.