Түркістан облысының білімді де талапты оқушылары тағы бір маңызды белесті бағындырды. Биыл өңірден 251 оқушы «IQanat» республикалық олимпиадасының ақтық кезеңіне жолдама алып, үздіктер қатарынан көрінді.
Ауыл мектептерінің оқушыларына арналған бұл жоба – дарынды жастарды қолдап, олардың үлкен мүмкіндіктерге қол жеткізуіне бағытталған ерекше бастама. Олимпиада барысында қатысушылар бірнеше іріктеу кезеңінен өтіп, өздерінің білім деңгейін, логикалық ойлау қабілетін және жан-жақты дайындығын дәлелдеді.
Финалға жолдама алған оқушылар енді республика деңгейінде бақ сынап, білім сайысында өз өңірінің намысын қорғайды. Бұл кезеңде үздік нәтиже көрсеткендерге жетекші оқу орындарына түсуге мүмкіндік беретін гранттар мен түрлі білім бағдарламалары ұсынылады.
Ұстаздар мен ата-аналар шәкірттеріне зор үміт артып отыр. Ал оқушылар өз кезегінде сенімді ақтап, жоғары нәтиже көрсетуге ниетті.
Жалпы, «IQanat» олимпиадасы ауыл жастарының білімге деген қызығушылығын арттырып, олардың болашағына берік негіз қалыптастырып келеді.