Астана төрінде өткен «Қазақстан – Сириус» II Халықаралық таланттар саммиті – білім мен ғылымның, жас дарындар мен ұстаздардың басын қосқан маңызды алаңға айналды. Бұл жиын тек тәжірибе алмасу ғана емес, ел болашағын айқындайтын интеллектуалды күштердің тоғысқан нүктесі болды.
Саммит аясында Қазақстан Республикасы Оқу-ағарту министрлігі мен Ресей Федерациясындағы «Талант және табыс» білім беру қоры арасындағы стратегиялық серіктестік жаңа деңгейге көтеріліп, халықаралық білім кеңістігіндегі байланыс нығая түсті. Мұндай әріптестік – дарынды жастарға кең мүмкіндік ашатын көпір.
Осы ауқымды жиында Түркістан облысы, Отырар ауданындағы «№1 жалпы білім беретін мектептің» намысын қорғаған информатика пәні мұғалімі Абылай Мұхтарұлы мен 10-сынып оқушысы Әлімхан Әлинұр өздерінің жоғары дайындығын айқын көрсетті. Әсіресе, жас дарын Әлімханның «Сәулет және қала құрылысы бағытындағы жобалық интенсив» тақырыбындағы жобасы сарапшылар тарапынан жоғары бағаланды.
Білім мен ізденістің нәтижесінде Әлімхан Әлинұр Қазақстан Республикасының Оқу-ағарту министрі Жұлдыз Сүлейменова тарапынан арнайы марапатқа ие болды. Бұл – тек бір оқушының жетістігі ғана емес, өңірдегі білім сапасының, ұстаз еңбегінің айқын көрінісі.
Отырарлық оқушының бұл жетістігі – ауыл мектебінен шыққан дарындардың да халықаралық деңгейде топ жара алатынын дәлелдейді. Бүгінгі Әлімхан – ертеңгі ел тірегі. Оның табысы мыңдаған жасқа жігер беріп, үлкен армандарға жетелейтіні сөзсіз.
Осындай жетістіктер – еліміздің білім беру жүйесінің даму бағыты дұрыс екенін көрсетеді. Ендігі мақсат – осындай таланттарды қолдап, олардың әлеуетін толық ашуға жағдай жасау.