дереккөз фото: Gov.kz
Қостанай қалалық білім бөлімінің басшысы Гүлсім Оразбаева ірі көлемдегі алаяқтық жасады деген күдікпен ұсталды. Бұл туралы прокуратураның ресми мәліметінде айтылды.
Тергеу нұсқасына сәйкес, білім бөлімінің лауазымды тұлғалары өзге де тұлғалармен алдын ала сөз байласып, қала мектептеріне бөлінген бюджет қаражатын жымқырған болуы мүмкін. Қылмыстық іс бойынша негізгі тергеу амалдарын ҚР Ұлттық қауіпсіздік комитеті жүргізуде.
Іс аясында күдіктілердің жұмыс орындары мен тұрғылықты мекенжайларында тінту шаралары өткізілді. Оның нәтижесінде білім бөлімінің басшысы ресми түрде қамауға алынды.
Гүлсім Оразбаева білім саласында ұзақ жылдар еңбек еткен тәжірибелі маман ретінде танылған. Ол еңбек жолын мұғалім болып бастап, кейін қалалық білім бөлімінде түрлі қызметтер атқарып, соңғы жылдары мекеме басшысы қызметін атқарған.
Тергеу жалғасуда. Күдіктінің кінәсі сотта дәлелденгенге дейін ол кінәсіз деп есептеледі.