Түркістан облысында ауыл шаруашылығы саласына арналған ұшқышсыз ұшу аппараттарын (дрондарды) құрастыратын жаңа өндіріс орны жұмысын бастады.
Жаңа кәсіпорында шығарылатын агродрондар егіс алқаптарын дәрілеу және тыңайтқыш шашу жұмыстарына арналған. Мамандардың мәліметінше, бір дрон 70 литрге дейін арнайы сұйықтық көтеріп, бір рейсте 5 гектарға дейінгі жерді өңдей алады.
Өңірде агродрондарды қолдану ауыл шаруашылығы тауарын өндірушілердің жұмысын жеңілдетіп, шығындарды азайтуға мүмкіндік береді. Сонымен қатар егістік алқаптарын өңдеу сапасы артып, еңбек өнімділігі де жоғарылайды.
Жергілікті билік өкілдерінің айтуынша, заманауи технологияларды енгізу агроөнеркәсіп кешенін цифрландыруға және ауыл шаруашылығының тиімділігін арттыруға жол ашады.