Ресей үкіметі Қазақстанның солтүстік және солтүстік-шығыс өңірлерін газдандыруға бағытталған жаңа газ құбырының құрылысын өз аумақтық жоспарлау схемасына енгізді. Бұл құбыр Тюмень облысының бірнеше ауданы мен ауылдық елді мекендері арқылы өтеді.
Жоспарға сәйкес, жаңа газ құбырының өткізу қабілеті жылына 10 миллиард текше метрді құрайды. Сонымен қатар, оның тұрақты жұмыс істеуін қамтамасыз ету үшін 50 МВт қуатқа ие компрессорлық станциялар салынады.
Қазақстанның солтүстік және солтүстік-шығыс өңірлерінде газдандыру деңгейі төмен. Жаңа инфрақұрылымдық жоба аталған аймақтарды көгілдір отынмен қамтамасыз етіп, жергілікті халық пен кәсіпорындарға тұрақты энергия көзін ұсынуы мүмкін.
Қазіргі таңда құбыр құрылысының нақты мерзімдері жарияланған жоқ. Дегенмен, оны Ресейдің аумақтық жоспарлау схемасына енгізу – жобаның іске асу ықтималдығы жоғары екенін көрсетеді. Алдағы уақытта екі ел үкіметтері газ құбырының техникалық және қаржылық аспектілерін талқылауы мүмкін.