дереккөз фото: Aikyn.kz
Мемлекет басшысының тапсырмасымен жүзеге асырылып жатқан «Келешек мектептері» ұлттық жобасы еліміздегі білім беру жүйесін жаңғыртуға бағытталған маңызды бастамалардың бірі. Жобаның басты мақсаты – қала мен ауыл арасындағы білім сапасындағы алшақтықты азайтып, әрбір оқушыға заманауи әрі қолайлы білім алу мүмкіндігін жасау.
Жоба аясында еліміздің әр өңірінде жаңа мектептер салынып, оқушыларға қажетті заманауи инфрақұрылым қалыптастырылуда. Атап айтқанда, пәндік кабинеттер, зертханалар, спорт залдары, кітапханалар мен шығармашылық орталықтар қарастырылған. Бұл балалардың жан-жақты дамуына жағдай жасап, білім сапасын арттыруға мүмкіндік береді.
Сондай-ақ жаңа мектептер үш ауысымды оқыту мәселесін шешуге және оқушы орындарының тапшылығын азайтуға ықпал етеді. Ерекше білім беру қажеттілігі бар балалар үшін де қолайлы орта қалыптастыру көзделген.
Сарапшылардың пікірінше, «Келешек мектептері» жобасының ұзақ мерзімді нәтижесі елдегі адами капиталдың сапасын арттырып, бәсекеге қабілетті ұрпақ тәрбиелеуге негіз болады. Сондықтан бұл бастама тек жаңа ғимараттар салумен шектелмей, білім беру мазмұны мен оқыту сапасын жетілдіруге бағытталған стратегиялық жоба ретінде бағалануда.
«Келешек мектептері» – болашаққа салынған инвестиция. Жобаның табысты жүзеге асуы қазақстандық оқушылардың сапалы білім алуына және еліміздің зияткерлік әлеуетін нығайтуға жол ашады.