Жақында 5-сыныпқа арналған «Қазақ тілі мен әдебиеті. Бәйшешек» оқулығынан күмәнді сілтеме табылып, қоғамда үлкен резонанс туғызды. Бастапқыда ақын Қалқаман Сариннің шығармашылығына арналған сайтқа бағытталған сілтеме (https://kalkamansarin.kz) кейіннен букмекерлік кеңсенің веб-парақшасына айналып кеткен.
Білім мазмұнын сараптау орталығының мәліметінше, оқулық 2017 жылы басылған кезде бұл сілтеме ақынның ресми сайтына апаратын болған. Алайда уақыт өте келе қаскөйлер оны өз мақсаттарына пайдаланып, сілтемені құмар ойындар қызметін ұсынатын платформаға бұрып жіберген. Бұл оқулықпен жұмыс істейтін оқушылар мен ата-аналардың алаңдаушылығын туғызды.
Орталық өкілдері қазіргі уақытта сайттың қалыпты жұмыс істеп тұрғанын және сілтеменің дұрыс бағытталуын қамтамасыз еткенін хабарлады. Сонымен қатар, биыл бұл оқулық қайта басылып, оның мазмұны мұқият тексерілмек. Бұл оқиға білім беру саласында бақылау мен қауіпсіздікті күшейту қажеттігін көрсетіп отыр.