Мәжіліс депутаты, «AMANAT» партиясы фракциясының мүшесі Қайрат Балабиев Atameken Business телеарнасына сұхбат беріп, жекеменшік балабақшаларға жүргізіліп жатқан тексерістерге қатысты өз пікірін білдірді.
Депутаттың айтуынша, жекеменшік балабақшалар мемлекет үшін тиімді, себебі олар бюджеттік шығынды азайтып, жаңа жұмыс орындарын ашады. Алайда, қазіргі уақытта балабақша иелері жиі тексерістерге ұшырап, миллиондаған теңге айыппұл төлеуге мәжбүр.
Кәсіпкерлерді қолдау қажеттігі айтылды
Қаңтар айында Қайрат Балабиев Арыс қаласындағы жекеменшік балабақша құрылтайшыларымен кездесті. Жиында кәсіпкерлер өз мәселелерін көтеріп, мемлекеттік қолдау қажеттігін жеткізген.
«Мемлекет бір балабақша салу үшін 600 млн-нан 1 млрд теңгеге дейін қаржы жұмсайды. Ал жекеменшік балабақшалар кәсіпкерлердің өз қаражатына салынып, жаңа жұмыс орындарын ашады. Сондықтан мемлекет оларды қолдауы керек», – деді Қайрат Балабиев.
Депутаттың пікірінше, жекеменшік балабақшаларға шамадан тыс айыппұл салу олардың жабылуына әкеліп соғуы мүмкін. Сондықтан бұл мәселені шешу үшін тиімді шаралар қабылдау қажет.