Түркістан қаласында ерекше күтімді қажет ететін балаларға ерекше көңіл бөліп, олардың арман-тілектерін орындауға бағытталған «Қайырымды іс – жан азығы» атты тағылымды іс-шара өтті. Игі бастама балаларға қуаныш сыйлап қана қоймай, қоғамдағы мейірімділік пен жанашырлықтың маңызын тағы бір мәрте көрсетті.
Тағылымды шараға облыстық мәслихат төрағасы Нұралы Әбішов пен облыс әкімінің орынбасары Ертай Алтаев қатысып, балаларға жылы лебіздерін білдірді. Сонымен қатар игі бастамаға қолдау көрсеткен демеушілерге алғыс айтылып, олардың еңбегі марапатталды.
Облыс әкімінің орынбасары Ертай Алтаев балалық шақтың әр адам өміріндегі орны бөлек кезең екенін атап өтіп, балалардың құқығын қорғау, денсаулығын сақтау және олардың жан-жақты дамуына жағдай жасау – ортақ міндет екенін жеткізді.
«Әрбір бала бақытты балалық шаққа, қамқорлыққа, сүйіспеншілікке, қауіпсіз ортаға және өз арманына сенуге құқылы», – деген ол іс-шараны ұйымдастырушыларға, демеушілерге, ата-аналарға, еріктілер мен қайырымды жандарға алғысын білдірді.
Шараның ең әсерлі сәті – балалардың көптен күткен армандарының орындалуы болды. Іс-шара барысында 20-ға жуық баланың тілегі орындалып, арнайы сыйлықтар табысталды. Бір балаға велосипед сыйға тартылса, енді біріне қажетті жиһаз алуға және киім дүкенінен сауда жасауға сертификаттар берілді.
Қайырымдылық шарасына Арыс, Кентау, Түркістан қалалары мен Сауран, Бәйдібек және Созақ аудандарынан келген ерекше балалар да қатысты. Оларға да арнайы сый-сияпаттар табысталып, көтеріңкі көңіл күй сыйланды.
Балалар үшін арнайы мерекелік бағдарлама ұйымдастырылды. 200-ге жуық бүлдіршін «TURAN MALL» сауда орталығындағы «Prime Cinema» кинотеатрында мультфильм тамашалады. Бұдан бөлек, мерекелік дастархан жайылып, балалар естелікке суретке түсті.
Шара барысында балалардың жас ерекшелігі мен мүмкіндіктері ескеріліп, жеңіл әрі қауіпсіз ойындар ұйымдастырылды. Осылайша бүлдіршіндер бір күнге болса да күнделікті өмірден алаңдап, достарымен бірге көңілді уақыт өткізді.
Бір баланың қуанышы – бір отбасының бақыты. Ал оның арманын орындау – тұтас қоғамның мейірімін көрсететін ізгі іс. Түркістандағы бұл бастама қайырымдылықтың нақты іспен көрініс тауып, балаларға деген қамқорлықтың жалғаса беретінін аңғартты.