25 қыркүйек – Қазақстан үшін қаралы күн. Бүгін елімізде жалпыұлттық аза тұту күні жарияланып, қызметтік міндетін атқару кезінде қаза тапқан әскери қызметшілердің қазасына байланысты бүкіл халықтың қабырғасы қайысып отыр.
Жап-жас азаматтардың өмірі қас-қағым сәтте үзілді. Кеше ғана елінің тыныштығы мен қауіпсіздігі үшін қызмет етіп жүрген боздақтар бүгінде туған-туыстарының жүрегінде өшпес із қалдырды.
Бұл – бір әулеттің ғана емес, тұтас елдің қасіреті. Артында аңырап ата-анасы, бауырлары, жары мен балалары қалды. Ең ауыр қайғы – жақын адамынан айырылу. Ал жап-жас ғұмырдың мезгілсіз үзілуі жүрекке одан сайын батады.
Қаза болған азаматтар ел алдындағы қызметін абыроймен атқарып жүрді. Олардың ерлігі мен азаматтық борышы ел жадында сақталады.
Бүгін көк туымыз төмен түсіп, ел еңсесі езілді. Барша қазақстандық қаралы отбасының қайғысына ортақтасып, қаза болғандардың рухына тағзым етуде.
Жап-жас ғұмырлар үзілді…
Орны толмас өкініш, жүрекке жазылмас жара қалды.
Қаза болған азаматтардың иманы саламат болсын. Жатқан жерлері жайлы болғай. Артында қалған ағайынға Алла сабыр берсін.
Ел үшін өмірін қиған боздақтардың есімі халық жадында мәңгі сақталады.