Арыс қаласының ішкі көшелерінде жол жөндеу жұмыстары басталды. Қала әкімдігінің мәліметінше, бұл шара жол инфрақұрылымын жақсарту, көлік қозғалысының қауіпсіздігін арттыру және тұрғындардың жайлы қатынауын қамтамасыз ету мақсатында қолға алынған.Бұл туралы Arysinfo.kz тілшісі хабарлайды.
Қазіргі таңда ойылған және зақымданған жол учаскелерін қалпына келтіру жұмыстары жүргізілуде. Арнайы мамандар көшелердің жағдайын зерделеп, жөндеуді қажет ететін аумақтарды белгілеп қойған. Ендігі кезекте жол жабындысын қалпына келтіру жұмыстары кезең-кезеңімен жүзеге асырылмақ.
Жолдарды жөндеу бірнеше кезеңнен тұрады:
Алдын ала зерттеу – мамандар көшелердің жағдайын тексеріп, жөндеуді қажет ететін аумақтарды анықтайды.
Дайындық жұмыстары – зақымдалған учаскелер тазартылып, асфальт жабындысын төсеуге әзірленеді.
Асфальт төсеу және қалпына келтіру – арнайы техника көмегімен жолдың беткі қабаты жаңартылып, көлік қозғалысына ыңғайлы жағдай жасалады.
Жол жөндеу жұмыстары кезінде көлік қозғалысында уақытша шектеулер болуы мүмкін. Қала әкімдігі тұрғындарды түсіністік танытуға шақырып, қауіпсіздік шараларын сақтауды сұрайды.