Ауылдық жерлерде үйірлі шегірткеге қарсы жүйелі күрес жұмыстары жүріп жатыр. Зиянкес жәндіктердің таралуының алдын алу мақсатындағы шаралар жергілікті халықтың назарынан тыс қалмады. Егістік пен жайылымды аман сақтап қалу жолында еңбек етіп жүрген мамандардың жұмысына ауыл тұрғындары ризашылықтарын білдірді.
«Күннің аптап ыстығына қарамай, таңсәріден бастап тыным таппай жүрген мамандарға айтар алғысымыз шексіз. Біз үшін ең маңыздысы — мал өрісін, егінімізді қорғау. Өнім мол, жылымыз тоқ болсын десек, осындай алдын алу шаралары қажет», – дейді ауыл ақсақалдарының бірі.
Шегіртке жайлаған маусымда бұл жұмыстардың маңызы арта түсетіні сөзсіз. Тұрғындар мамандарға сенім артып, олардың еңбегі ел игілігі үшін екенін айтып отыр. Сонымен қатар, көпшілік қауым жайылымдық алқаптарды жіті бақылап, тиісті органдарға дер кезінде хабар беруге дайын екендіктерін жеткізді.