Қазығұрт ауданында әлеуметтік қолдау жүйесін толықтай цифрлық форматқа көшіру бағытында оқыту семинары ұйымдастырылды. Шара аясында мемлекеттік қолдау механизмдерінің тиімділігін арттыру, халықпен жұмыс сапасын жақсарту мақсатында жаңадан енгізіліп жатқан ақпараттық жүйелер таныстырылды.
Семинарға ҚР Мәдениет және ақпарат министрлігі жанындағы “Отбасын қолдау орталықтарының қызметін жетілдіру жөніндегі жобалық кеңсенің” басшысы Сағындық Фарида, жобалық топ мүшелері және Түркістан облысы Жұмыспен қамтуды үйлестіру және әлеуметтік бағдарламалар басқармасы басшысының орынбасары Күміс Мирова қатысты. Жиынды аудан әкімінің орынбасары Мадияр Оразалиев ашып, жүргізді.
Оқыту жұмыстарына аудандық полиция бөлімінен бастап, білім және денсаулық сақтау мекемелерінің қызметкерлері мен ауыл әкімдері белсенді қатысты. Мамандарға FSM Social және Socium автоматтандырылған ақпараттық жүйелерінің жұмыс тәртібі жан-жақты түсіндірілді.
Бұл платформалар мемлекеттік қолдау шараларын көрсету ісін автоматтандыруға, деректермен нақты жұмыс істеуге және адами қатені азайтуға бағытталған. Сонымен қатар, мобильді қосымшалар арқылы қызметтердің жылдам әрі тиімді көрсетілуіне жол ашылады.