Арыс қаласының басты спорттық ұжымдарының бірі саналатын «Арыс» футбол клубы Қазақстан чемпионатының екінші лигасында кезекті маңызды кездесуді сәтті аяқтады. 18-турда алматылық «Жейран» командасымен сырт алаңда өткен матч жерлестеріміз үшін табысты болып, ойын 2:0 есебімен аяқталды.
Кездесудің алғашқы минуттарынан-ақ қос команда тартысты ойын өрнегін көрсетті. Дегенмен алаң иелерінің қысымына қарамастан, «Арыс» ойыншылары жылдамдық пен тактикалық шеберлікті тиімді пайдаланып, бірінші таймда есеп ашты. Үзілістен кейін де қарқынын бәсеңдетпеген арысдықтар екінші гол соғып, жеңісті еселей түсті.
Бұл нәтиже клуб үшін үлкен маңызға ие. Өйткені турнирлік кестеде қосымша ұпай еншілеп, өз орнын біршама жақсартуға мүмкіндік берді. Команданың жеңіс жолына қайта түсуі жанкүйерлердің де сенімін нығайтты.
Клуб басшылығының айтуынша, жетістік – тек ойыншылардың ғана емес, жаттықтырушылар штабының тыңғылықты жұмысының және жанкүйерлердің қолдауының арқасы. Қала басшылығы да жергілікті команданың жетістігіне ерекше мән беріп, спортшыларға әрқашан қолдау білдіріп келеді.
Спорт мамандары бұл жеңістің психологиялық тұрғыдан да үлкен серпіліс бергенін айтады. Маусымның шешуші кезеңінде әрбір ұпайдың маңызы зор. Сондықтан алдағы турларда да «Арыс» командасы тыңғылықты дайындық жүргізіп, жеңіс жолын жалғастыруды мақсат тұтып отыр.
– Жігіттер бүгінгі ойында жанқиярлықпен ойнады. Әрбір шабуылда сенімділік танытып, қорғаныста бірлік көрсетті. Бұл жеңіс біздің еңбегіміздің жемісі. Әлі де алда талай сын тұр, сондықтан босаңсуға болмайды, – деді клуб бапкерлерінің бірі.
Футбол сүйер қауым үшін мұндай жеңістер тек спорттық көрсеткіш емес, сонымен қатар өңірдің беделін арттыратын маңызды оқиға болып саналады. Арыс қаласының жасөспірімдері үшін де жергілікті команданың жеңісі үлкен мотивация болмақ.
Бердалы Ораз(аймақ тілшісі)