Арыс қаласында аса қауіпті марокко шегірткесіне қарсы күрес жұмыстары қарқынды жүргізілуде
— деп хабарлайды Arysinfo.kz.
Көктем шыға табиғатпен бірге зиянкестер де қаптай бастайды. Осы орайда Арыс қаласының ауыл шаруашылығы мамандары марокко шегірткесінің алдын алу және онымен күрес бағытындағы шараларды бастап кетті. Аталған зиянкес егістік пен жайылымға зор залал келтіретіндіктен, мамандар ерте көктемнен бастап далалық тексеру жұмыстарын жүргізуде.
Қазіргі таңда Арыс қаласына қарасты ауылдық округтерде зиянкестердің таралу ошақтары анықталып, арнайы техника мен улы препараттар арқылы өңдеу жұмыстары жүргізілуде. Қала аумағында жалпы 12 мың гектардан астам жерге мониторинг жасалып, қауіпті аумақтарда дәрілеу шаралары қолға алынды.
Мамандардың айтуынша, марокко шегірткесі өте жылдам көбейіп, бірнеше күн ішінде үлкен аумақты жайпауы мүмкін. Сондықтан уақтылы әрекет ету – басты міндет. Күннің ыстығына қарамастан таң сәріден бастап жұмысқа кірісетін зиянкестерге қарсы топ далада тынымсыз еңбек етуде.
Ауыл тұрғындары да бұл жұмыстарға қолдау көрсетіп, мамандардың еңбегіне алғыстарын білдіруде. Олар үшін ең маңыздысы — егін мен мал азығы сақталып, ауыл шаруашылығы зардап шекпесе болғаны.