Премьер-министрдің орынбасары Қанат Бозымбаев Жамбыл облысына жұмыс сапары аясында Тараз қаласында еліміздің оңтүстік өңірлерінің әлеуметтік-экономикалық дамуы және «Ауыл аманаты» жобасының іске асырылу барысы бойынша кеңес өткізді.
Кеңеске Жамбыл, Түркістан, Қызылорда облыстары мен Шымкент қаласының әкімдері, сондай-ақ ұлттық экономика және қаржы вице-министрлері қатысты. Жиында жаңа Бюджет кодексі аясында бюджеттік жоспарлау мен Өңірлік стандарттар жүйесі түсіндірілді.
2024 жылғы деректерге сәйкес, өңірлердегі қамтамасыз ету деңгейі:
- Шымкент – 87,9% (республика бойынша 2-орын),
- Жамбыл облысы – 74,1% (4-орын),
- Қызылорда облысы – 66,8% (6-орын),
- Түркістан облысы – 66,3% (14-орын).
Бозымбаев инфрақұрылымдық жобаларды жоспарлау кезінде өңірлік стандарттарға қатаң сүйену қажеттігін атап өтті. Сондай-ақ артта қалған елді мекендерді бірінші кезекте қаржыландыруды тапсырды.
«Ауыл аманаты» жобасы аясында:
- Жамбыл облысында – 10 мың,
- Қызылорда облысында – 8 мың,
- Түркістан облысында – 23 мың жұмыс орны ашылады.
Бозымбаев бұл жобаларды іске асыруды жеделдетіп, қосымша қаржыландыру тетіктерін пысықтауды тапсырды.
Сапар барысында вице-премьер Қазақ ұлттық су шаруашылығы және мелиорация университетіне барып, жаңа шағынауданда салынып жатқан тұрғын үйлер мен Түйте каналы жағалауындағы абаттандыру жұмыстарымен танысты.