Қазақстан Президенті Қасым-Жомарт Тоқаев пен Түрікменстан Халк Маслахатының Төрағасы Гурбангулы Бердімұхамедов Түркістан қаласындағы бірқатар тарихи-мәдени нысандарды аралады.
Мемлекет басшылары алдымен «Әзірет Сұлтан» музей-қорығы аумағындағы ұлттық-мәдени «Этноауыл» кешеніне барды. Олар шығыс базарын аралап, дәнді дақылдар сұрыптарымен танысты. Меймандарға ұлттық тағам түрлері мен халық қолөнері туындылары таныстырылып, салт-дәстүрімізді дәріптейтін театрландырылған қойылым ұсынылды. Сондай-ақ тазы иттері мен қыран құстар көрсетілді.
Одан кейін қос тарап Қожа Ахмет Ясауи кесенесіне зиярат етті. Президенттер әйгілі ойшылдың рухына тағзым етіп, Құран бағыштады. Сонымен қатар кесенеде жүргізіліп жатқан реставрациялық және ғылыми-зерттеу жұмыстарының барысымен танысты. Бұл кесене – ЮНЕСКО Бүкіләлемдік мұралар тізіміне енген, түркі әлемінің ең көрнекті рухани және тарихи ескерткіштерінің бірі.