Астанада өткен баспасөз мәслихатында Қазақстан мұсылмандары діни басқармасының төрағасы, Бас мүфти Наурызбай қажы Тағанұлы кәсіпкерлерге Құрбан айт кезінде мал бағасын жасанды түрде қымбаттатпау жөнінде үндеу жасады.
Оның айтуынша, Құрбан айт — тек діни мереке ғана емес, мейірім мен бірліктің, татулық пен қайырымдылықтың символы.
«Еліміздегі барлық кәсіпкерлерді Құрбан айт кезінде мал бағасын қолдан көтермеуге, халықтың әлеуметтік жағдайын ескеріп, тиімді баға ұсынуға, сондай-ақ күнделікті тұтынатын азық-түлікке мүмкіндігінше жеңілдік жасауға шақырамын», — деді Бас мүфти.
Сонымен қатар мереке күндері еліміздің өңірлерінде қайырымдылық және мәдени іс-шаралар ұйымдастырылатыны айтылды. Мешіттердің жанында киіз үйлер тігіліп, ұлттық ойындар мен рухани кештер өтеді.
Сондай-ақ Бас мүфти халықты ұлттық киім киіп, мерекелік шараларға белсенді қатысуға шақырып, бұл дәстүр мен бірлік рухын нығайтатынын атап өтті.