Түркістанда өткен халықаралық конференцияда өңірдің рухани мұрасы мен туристік әлеуетін дамыту мәселелері кеңінен талқыланды. Басқосуда Түркістан облысы әкімінің орынбасары Ертай Алтаев баяндама жасап, ішкі туризмді дамыту мен киелі орындарды халықаралық деңгейде насихаттаудың маңызын атап өтті.
Оның айтуынша, Мемлекет басшысының туризм саласын дамыту жөніндегі тапсырмасына сәйкес, Түркістан облысында туристік инфрақұрылымды жетілдіру бағытындағы жұмыстар жүйелі жалғасып келеді. 2025 жылдың қорытындысы бойынша өңірдегі орналастыру орындарында демалғандар саны 347,6 мың адамға жетіп, өткен жылмен салыстырғанда 14,7 пайызға артқан. Сонымен бірге тарихи орындарға келушілер саны 1 миллион адамға жетіп, 13 пайыздық өсім көрсеткен.
Бүгінде Түркістан өңірінде тарихи-танымдық, экологиялық және емдік-сауықтыру туризмі қарқынды дамуда. Туризм саласына 133 млрд теңге инвестиция тартылып, қалада бірнеше ірі туристік жобалар жүзеге асырылып жатыр. Сонымен қатар визит орталықтарын ашу, туристік нысандарға апаратын жолдарды жаңғырту және сервистік сапаны арттыру жұмыстары кезең-кезеңімен қолға алынған.
Конференция барысында Қожа Ахмет Ясауи атындағы Халықаралық қазақ-түрік университеті дінтану кафедрасының профессоры, философия және теология ғылымдарының докторы Досай Кенжетаев және Халықаралық туризм және меймандостық университеті Басқарма төрағасы – ректор міндетін атқарушы Бекежан Мырзаев мазмұнды баяндамалар жасады.
Сондай-ақ Мұрат Мұқаев, Гүлнәр Тойлыбаева және Бахадыр Нарымбетов Түркістанның өндірістік, мәдени және туристік даму деңгейіне жоғары баға беріп, өңірдің стратегиялық маңызын ерекше атап өтті.
Жиын қорытындысында қатысушылар Түркістандағы бұл басқосудың ұлттық руханиятты, тарихи сананы және өңірлік дамуды тоғыстырған маңызды қоғамдық алаңға айналғанын жеткізді. Сонымен бірге Қожа Ахмет Ясауи кесенесі мұрасын халықаралық деңгейде дәріптеу және Түркістанды әлемдік мәдени-рухани туризм орталығы ретінде дамыту жұмыстарын жалғастыру қажеттігі айтылды.
Екі күнге созылатын конференция аясында қонақтар Түркістан қаласындағы тарихи орындарды аралап, Отырар ауданы мен Ордабасы ауданы аумағындағы туристік және киелі нысандармен танысады.