Түркістан облысының әкімдігі жауын-шашынды жасанды ұлғайту жобасы мен ауыл шаруашылығы дақылдарының ауруға шалдығуы арасында байланыс бар деген ақпаратқа ресми түсініктеме берді.
Әкімдік мәліметінше, бұлт себу жұмыстары облыстың жекелеген аумақтарында ғана жүргізілген және өңірдегі жалпы ауа райына немесе ірі атмосфералық процестерге әсер ете алмайды. Жоба Отырар ауданының солтүстік-батыс бөлігінде және Созақ ауданының орталық әрі солтүстік аумақтарында жүзеге асырылған.
Мамандардың айтуынша, жауын-шашынды жасанды көбейту үшін табиғи түрде қалыптасқан бұлттар пайдаланылады. Ұшақтар бұлттарға арнайы экологиялық қауіпсіз материалдар шашып, жауын-шашын түсу ықтималдығын арттырады.
Облыс әкімдігі мамыр айының соңында өңірде байқалған ұзаққа созылған жауын-шашынды аталған жобамен байланыстыруға негіз жоқ екенін мәлімдеді. Өйткені жауын-шашын табиғи синоптикалық жағдайлардың әсерінен болған және мұндай құбылыс еліміздің өзге өңірлерінде де тіркелген.
Әкімдік тұрғындарды тек ресми әрі тексерілген ақпаратқа сүйенуге шақырды