Қарнақ ауылында «Даналық көпірі» атты интерактивті кездесу ұйымдастырылды. Басқосуға қалалық Қазақстан халқы Ассамблеясы жанындағы Ақсақалдар кеңесінің мүшесі, Қарнақ ауылдық өзбек этномәдени бірлестігінің төрағасы Бегзат Хабибов, қалалық мәслихат төрағасы Қаблан Елеусізов және ауыл тұрғындары қатысты.
Кездесудің негізгі мақсаты – ауылдағы өзекті әлеуметтік мәселелерді бірлесе талқылап, тұрғындар мен жергілікті билік өкілдері арасында ашық әрі сындарлы диалог қалыптастыру, сондай-ақ этносаралық татулық пен қоғамдық келісімді нығайту болды.
Жиын барысында тұрғындар ауыл инфрақұрылымын дамыту, жастардың бос уақытын тиімді ұйымдастыру, спорт және мәдени нысандардың қажеттілігі, әлеуметтік жағдайды жақсарту бағытындағы ұсыныс-пікірлерін ортаға салды.
Сонымен қатар кездесуде ауыл тұрғындарының өзара сыйластығы мен ынтымағын сақтау – баршаға ортақ міндет екені ерекше атап өтілді.