дереккөз фото:Aikyn.kz
Бұқаралық ақпарат құралдары – қоғамның тынысын танытып, ел мен халық арасындағы алтын көпір қызметін атқаратын маңызды институт. Ақпарат ғасырында журналистің жауапкершілігі артып, оның қоғамдық пікір қалыптастырудағы рөлі бұрынғыдан да күшейе түсті.
Осы орайда Мемлекет басшысының отандық журналистиканың дамуына үлес қосқан бір топ БАҚ өкілін мемлекеттік наградалармен марапаттауы – ақпарат саласы мамандарына көрсетілген зор құрметтің белгісі. Бұл шешім журналист еңбегінің мемлекет деңгейінде бағаланатынын тағы бір мәрте дәлелдеді.
Марапатталғандардың қатарында облыстық «Южный Казахстан» газетінің тілшісі Татьяна Корецкаяның болуы – өңірлік журналистиканың да беделі жоғары екенін көрсетеді. Оның «Парасат» орденіне ие болуы көп жылғы қажырлы еңбектің, кәсіби шеберліктің және ел мүддесіне адал қызмет етудің нәтижесі.
Бүгінде журналистер тек жаңалық таратушы ғана емес, қоғамдағы өзекті мәселелерді көтеріп, халық пен билік арасындағы ашық диалогтың қалыптасуына ықпал ететін маңызды тұлғаларға айналды. Сондықтан олардың еңбегін бағалау – сөз еркіндігіне, кәсіби журналистикаға және сапалы ақпаратқа деген құрмет.
Президенттің бұл бастамасы ақпарат саласында еңбек етіп жүрген мыңдаған маманға жаңа серпін беріп, олардың қоғам алдындағы жауапкершілігін одан әрі арттыра түсетіні сөзсіз.