Түркістан облысында суармалы жерлердің мелиоративтік жағдайын жақсарту бағытында ауқымды жұмыстар атқарылды. «Қазсушар» РМК-ның өңірлік филиалы Жетісай мен Мақтаарал аудандарында сор шаю жұмыстарын сәтті жүзеге асырып, ауыл шаруашылығына тың серпін берді.
Жүргізілген жұмыстар нәтижесінде Жетісай ауданы аумағындағы 53,6 мың гектар және Мақтаарал ауданы бойынша 41 мың гектар егістік жер сордан тазартылып, бұл мақсатқа жалпы 400 млн текше метр су пайдаланылды. Бұл – өңірдегі мақта және басқа да дақылдардың өнімділігін арттыруға бағытталған маңызды қадам.
Сонымен қатар, Шардара ауданы аумағында 8,1 мың гектар алқапта топырақты ылғалдандыру жұмыстары жүргізілуде. Қазіргі таңда бұл бағытта 262 млн текше метр су беріліп, диқандардың көктемгі егіс науқанына дайындығы қарқын алған.
Жергілікті шаруалар су ресурстарының уақытылы әрі жеткілікті жеткізілуі егіннің өнімді болуына тікелей әсер ететінін айтады. Солардың бірі, диқан Ақжан Сүлейменбеков өз алқабында жүргізіліп жатқан жұмыстарға ризашылығын білдірді. Оның айтуынша, тұрақты су жеткізудің арқасында биыл мол өнім алуға мүмкіндік жоғары.
Мамандардың сөзінше, сор шаю – әсіресе мақта өсіруде шешуші маңызға ие. Өйткені бұл процесс топырақ құрамындағы тұзды азайтып, дақылдың дұрыс өсуіне жағдай жасайды. Ал ылғалдандыру жұмыстары егіс алдындағы дайындықтың негізгі кезеңдерінің бірі болып саналады.
Жалпы, атқарылып жатқан бұл жұмыстар Түркістан өңірінің аграрлық әлеуетін арттырып, шаруалардың табысын көбейтуге бағытталған жүйелі қадамдардың бірі ретінде бағалануда.