Қазақстанның 150 мыңға жуық азаматы бүгінде шетелде еңбек етіп жүр. Оның ішінде 100 мыңы Ресейде, ал 15 мыңға жуығы Кореяда жұмыс істейді.
Еңбек министрі Асқарбек Ертаев бұл жағдайдың тек Қазақстанға ғана емес, бүкіл әлемге тән үрдіс екенін айтады.
Министрдің сөзінше, жастар шетелге ең алдымен тәжірибе жинау, тіл үйрену және табыс табу үшін барады.
«Бұл – қалыпты құбылыс. Басқа елдермен салыстырғанда, біздің азаматтар саны аса көп емес. 150 мың – Сыртқы істер министрлігінің дерегі. Олар уақыт өте елге оралып, білікті маман ретінде еңбек етеді», – деді ол.
Бірақ қызығы – ел ішінде де жұмыс жеткілікті. Ресми мәлімет бойынша, ай сайын 102 мың бос жұмыс орны жарияланады. Оның 48 пайызы – жұмысшы мамандықтары.