Түркістан облысында жер қойнауын тиімді әрі заңды пайдалану мәселесі қатаң бақылауға алынды. Өңірде бүгінгі таңда кең таралған пайдалы қазбаларды өндірумен айналысатын 221 жер қойнауын пайдаланушы тіркелген. Оның ішінде 75-і келісімшарт негізінде, ал 146-сы лицензия арқылы жұмыс жүргізуде.
Бұл мәселе облыс әкімінің орынбасары Қанат Қайыпбек төрағалық еткен жиында кеңінен талқыланды. Күн тәртібінде заңсыз қазба жұмыстарының алдын алу, сондай-ақ өңірдегі «қызыл нүктелердің» жай-күйі қаралды.
Жиын барысында жауапты мекемелерге жұмысты жүйелеп, өзекті мәселелерді бірлесіп шешу міндеті қойылды. Әсіресе, заң аясында жұмыс істеп жатқан кәсіпкерлерге қолдау көрсету қажеттігі атап өтілді.
— Әрбір мәселенің артында халықтың әл-ауқаты мен өңір экономикасы тұр. Сондықтан бюрократияға жол бермей, нақты әрекет ету керек. Заңсыз қазылған нысандарға тұрақты мониторинг жүргізіп, рейдтерді күшейтіп, кінәлілерді жауапкершілікке тарту қажет, — деді Қанат Қайыпбек.
Айта кетейік, енді өңірде «қызыл нүктелерге» апта сайын рейдтік тексерулер ұйымдастырылып, заңсыз әрекеттерге жол берген тұлғаларға қатысты қатаң шаралар қабылданбақ.