Түркістан облысының әкімі Нұралхан Көшеров мерекелік жиынға арнайы қатысып, Түркістан қаласы №33 жалпы білім беретін мектебінің ұстаздары мен оқушыларын оқу жылының табысты аяқталуымен құттықтады. Өңір басшысы жас түлектерге ақ жол тілеп, ұстаздар қауымының өскелең ұрпақты тәрбиелеудегі өлшеусіз еңбегіне ризашылығын білдірді.
Облыс әкімі өз сөзінде білімнің маңызын ерекше атап өтіп, қазіргі заманның басты талабы – сапалы білім, еңбекқорлық және жаңашыл ойлау екенін жеткізді. Сондай-ақ биыл облыс бойынша 35 мыңнан астам түлек мектеп тәмамдап отырғанын, олардың қатарында 2416 «Алтын белгіге» және 3141 «Үздік аттестатқа» үміткер бар екенін айтты.
Түркістан облысы республика бойынша білім саласында көш бастап тұрған серпінді өңірлердің бірі саналады. Биыл өңірдегі 1106 орта мектепте 554 мыңнан астам оқушы білім алып, оқу жылын аяқтады. Бұл еліміздегі жалпы оқушылар санының 14,2 пайызын құрайды.
2025-2026 оқу жылында облыстағы 35 294 оқушы 11-сыныпты тәмамдады. Ұлттық бірыңғай тестілеуге 31 535 оқушы өтінім берген.
Биыл Түркістан облысының оқушылары білім мен ғылым саласында жоғары нәтижелерге қол жеткізді. Ауыл мектептеріне арналған республикалық олимпиадада облыс командасы тұңғыш рет Бас жүлдені жеңіп алып, «Ең үздік олимпиадалық команда – 2025» атағына ие болды. Сонымен қатар халықаралық және республикалық олимпиадаларда ондаған оқушы жүлделі орындарға ие болды.
АҚШ-тың Техас штатындағы Хьюстон қаласында өткен робототехникадан әлем чемпионатында Төлеби ауданының «TOLEBI DARYN» командасы FIRST LEGO League Challenge санаты бойынша әлемнің үздік бес командасының қатарына еніп, Champions Award финалисті атанып, ІІ орынды иеленді. Сонымен қатар Қазығұрт ауданының Qazygurt командасы Грекия мемлекетінде өткен халықаралық робототехника чемпионатында күміс жүлдеге ие болды.
Өңірде білім сапасын арттыру, дарынды оқушыларды қолдау және заманауи білім беру ортасын қалыптастыру бағытындағы жұмыстар жүйелі түрде жалғасуда. Биыл 20 білім беру ұйымы пайдалануға берілсе, оның 16-сы «Келешек мектебі» ұлттық жобасы аясында салынды.