Қазақстан Бірінші лигасының сегізінші турында түркістандық «Тұран» өз алаңында Екібастұздың «Батыр» командасын қабылдап, 4:0 есебімен жеңіске жетті.
Кездесудің алғашқы минуттарынан-ақ алаң иелері ойын тізгінін қолға алды. Матчтың 20-минутында Алимжан Еркен алыстан дәл соққы жасап, есеп ашты.
Екінші таймда «Тұран» шабуылды үдете түсті. 52-минутта Алимжан Еркен тағы бір гол соғып, дубль авторы атанды. Арада тоғыз минут өткенде шабуылшы хет-трик рәсімдеді. Ал 82 — минутта Оркен Махан төртінші голды соғып, матчтың нүктесін қойды.
Осы жеңістен кейін «Тұран» 15 ұпай жинап, турнир кестесінде төртінші орынға көтерілді. Келесі турда түркістандық клуб ақтаулық «Каспий М» командасымен кездеседі.