Қазақстанның барлық өңірінде онкологиялық аурулардың алдын алу және ерте анықтау мақсатында Ашық есік күні өтеді. Іс-шара аясында тұрғындар онколог мамандардан тегін кеңес алып, денсаулықтарын тексерте алады.
Дәрігерлердің айтуынша, мұндай шаралар қатерлі ісікті ерте кезеңде анықтауға мүмкіндік береді. Азаматтар емханалар мен онкологиялық орталықтарға алдын ала жазылмай-ақ барып, білікті мамандардың қабылдауына кіре алады.
Шара барысында тұрғындарға скринингтік тексерулердің маңызы түсіндіріліп, онкологиялық аурулардың алғашқы белгілері мен алдын алу жолдары жөнінде ақпарат беріледі. Мамандар денсаулыққа салғырт қарамауға және уақтылы тексерістен өтіп тұруға шақырады.
Қазақстан Республикасының Денсаулық сақтау министрлігі мәліметінше, Ашық есік күні еліміздің барлық өңіріндегі онкологиялық орталықтар мен көпсалалы ауруханаларда ұйымдастырылады.